O grupo municipal Marea de Vigo denunciou este luns a “degradación” do servizo de bus urbano na cidade, que se constata desde que se ampliou a concesión dese servizo, e criticou que ese empeoramento se notou tanto nas condicións laborais, como nas “carencias” relativas á prevención da COVID-19.
Así, o portavoz do grupo, Rubén Pérez Correa, lembrou que o propio comité de empresa puxo de manifesto estes problemas, aos que se suman o servizo deficiente ás parroquias, ou a falta de reforzo en horas puntas, que se traduciu en autobuses repletos en determinados horarios.
Pérez Correa volveu criticar a ampliación da concesión, xustificada polo goberno de Vigo pola pandemia e polas perdas da empresa durante o estado de alarma. A ese respecto, o portavoz de Marea apuntou que a Comisión Nacional dos Mercados e a Competencia emitiu un informe “contrario á ampliación”.
Segundo lembrou, o propio alcalde, Abel Caballero, admitía hai uns meses que o contrato de bus (coa concesionaria Vitrasa) era “inxusto e desfasado” no seu sistema tarifario, e que non cubría as necesidades da cidade.
Por iso, Marea de Vigo pediu “anular” a ampliación da concesión, e aproveitar a oportunidade para redeseñar un novo modelo de transporte urbano, empezando por “traballar na remunicipalización” do servizo.
