Os viños da denominación de orixe Rías Baixas recibiron ata 70 recoñecementos no concurso europeo Decanter World Wine Awards, organizado pola revista e o viño Decanter e que se celebrou durante o mes de agosto en Londres.

En concreto, os galardóns repartíronse en dúas medallas de platino cunha puntuación de 97 sobre 100; catro de ouro con 96 e 95 puntos; 21 de prata con puntuacións entre 92 e 90; e 31 de bronce con entre 89 e 86 puntos. Ademais, entregáronse 12 recomendacións, estas últimas para viños de Rías Baixas cunha puntuación de entre 85 e 84.

Os catadores internacionais premiaron a 44 marcas da anada 2019 desta denominación, 14 da 2018, dúas da 2017, 3 da 2016, outro tres da 2015 e da 2013 e, finalmente, unha da 2011. Con este palmarés, Rías Baixas convértese na denominación de orixe galega máis galardoada nos Decanter World Wine Awards.

O xurado da decimoséptima edición estivo integrado por 116 expertos do mundo do viño, entre os que figuraban 37 Masters of Wine e 9 Masters Sommeliers. O certame consistiu nunha cata a cegas das 16.518 mostras procedentes de 56 países. Destes viños, 13.507 obtiveron recoñecemento en forma de medalla. Concretamente, España recibiu 1.568 medallas, catro Best in Show, 20 medallas de platino, 68 ouros e 537 pratas, entre outros galardóns.