O portavoz do Grupo Municipal Socialista de Vigo, Carlos López Font, criticou que alcaldes e outros cargos locais do PPdeG que “sempre estiveron calados” protesten “agora que hai un goberno que deixa gastar os remanentes (municipais)” e “dá 5.000 millóns de euros adicionais” aos concellos que lle presten os seus aforros.
Así se pronunciou despois de que un cento de cargos locais do PPdeG se concentrasen ante o Concello de Vigo en rexeitamento ao acordo alcanzado pola Federación Española de Municipios e Provincias (FEMP) e o Goberno.
Este texto establece que o Executivo central achegará 5.000 millóns de euros aos concellos que lle presten os seus remanentes, aos que llos deberá devolver a partir de 2022 nun prazo de dez anos, aínda que a publicación no BOE apunta que este poderá dilatarse ata 2037.
Así as cousas, López Font incidiu en que a situación actual foi causada pola Lei de Estabilidade Orzamentaria e Sustentabilidade Financeira, aprobada polo PP durante a súa última etapa á fronte do Executivo central.
A ese respecto, sinalou que a normativa coñecida como ‘Lei Montoro’ “foi a que lle quitou competencias aos concellos e impediulles gastar os remanentes”.
Ante esta situación, lamentou que “agora que hai un goberno que deixa gastar eses remanentes e dá 5.000 millóns adicionais” aos municipios que opten por cedelos ao Goberno central os cargos do PP optasen por protestar. “O que non queren é que o presidente Sánchez arranxe o desaguisado municipal de Rajoy”, afirmou o edil socialista de Vigo.
