A Asemblea Xeral da patronal da conserva, Anfaco, elixiu este venres a Mané Calvo García-Benavides, conselleiro delegado do Grupo Calvo, novo presidente da organización, segundo trasladou a propia Anfaco.

Calvo García-Benavides (Madrid, 1968), que substituirá a Juan Manuel Cerqueira como presidente, é membro da Xunta Directiva de Anfaco desde 2007.

Na Asemblea Xeral celebrada este venres tamén se fixo balance das principais magnitudes do sector no pasado ano, no que a facturación das empresas do clúster creceu un 5 %, ata os 10.900 millóns de euros. Así mesmo, tamén a exportación de conservas tivo un bo comportamento, cun incremento do 0,6 % en volume e do 0,4 % en valor.

No entanto, as perspectivas para 2020 están marcadas pola crise sanitaria mundial debido á pandemia de coronavirus e, ante unha previsible “contracción do consumo”, Anfaco pediu máis campañas de promoción para activar a demanda.

Nesa liña, a patronal conserveira incidiu na importancia da reactivación da canle HORECA (hoteis, restaurantes e cafetarías), e na necesidade de ter en conta a afectación da crise nas tendas especializadas e retail.

Anfaco estimou que o impacto da crise no tecido industrial traducirase nun descenso da cifra de negocio de ente o 5 e o 10 por cento, o mesmo descenso que espera no consumo durante o “período postcrise”.