O Centro Tecnolóxico do Mar-Fundación Cetmar presentará este venres os avances do proxecto europeo MATES de impulso da economía azul, que apuntan á utilización de combustibles alternativos e fontes de enerxía renovable como claves do futuro da construción naval.

Os investigadores sinalaron ademais a importancia do uso de tecnoloxías baseadas en sensores e redes intelixentes e de macrodatos, segundo recolleu nun comunicado a Consellería do Mar, da que depende o centro coordinador do proxecto. Así, estes resultados serán presentados no seminario virtual ‘Fomento da Economía Azul no Atlántico: Estratexia de Formación e Capacitación’.

En concreto, este proxecto busca analizar a evolución da tecnoloxía marítima a nivel europeo co obxectivo de desenvolver un plan estratéxico de mellora da competitividade industrial mediante a adaptación da formación.

Ademais, apuntar que a dixitalización, a automatización e a robótica avanzada marcarán o futuro da construción naval, polo que se apostou por un impulso da formación continua combinada con prácticas ou mobilidades neste ámbito.

O proxecto MATES, que se iniciou en 2018 e desenvolverase ata 2022, priorizou 21 liñas de acción estratéxica para a capacitación do sector e a industria das enerxías renovables.

Deste xeito, puxéronse en marcha 11 experiencias piloto mediante os que se desenvolverán materiais didácticos, programas de capacitación e metodoloxías formativas e estudarase como estender o seu uso a outras rexións europeas. Así, aspírase a establecer unha estratexia común de formación na industria marítima a nivel europeo.

Neste sentido, abordaranse as necesidades de formación e capacitación en materia de economía azul, así como os traballos realizados a ese respecto e a posibilidade de establecer unha estratexia conxunta, no seminario que organizará este venres National Hub Spain.

Máis de 180 expertos e colaboradores participan no consorcio do proxecto MATES, financiado con fondos europeos mediante o programa Erasmus+. Esta iniciativa analiza as necesidades de capacitación dos traballadores para desenvolver un plan de acción a longo prazo centrado nas cadeas de valor da construción naval e as enerxías renovables mariñas. Para iso busca axuntar o esforzo de comunidades educativas e científicas coa industria, a sociedade e a Administración.