O delegado da Zona Franca de Vigo, David Regades, inaugurou este martes nas oficinas de Bouzas a terceira mesa de traballo enmarcada dentro do Programa Mulleres Conselleiras de Galicia, onde apostou por dar prioridade a todos aqueles factores que conflúan nun desenvolvemento “sustentable e inclusivo” para a Comunidade.

O programa, que contou coa participación de dez mulleres e homes de ampla traxectoria e experiencia nos consellos de administración e órganos de decisión, naceu para impulsar e visibilizar o papel da muller nos órganos de goberno das empresas galegas. Esta primeira fase, cuxa duración se estenderá ao longo dun ano, persegue obxectivos como identificar barreiras, elaborar un diagnóstico real e analizar casos de éxito, entre outros.

Neste sentido, Regades apuntou que as opinións vertidas polo panel de expertos serán “fundamentais” para poder levar a cabo accións e programas que realmente respondan as necesidades e rompan as barreiras actuais para alcanzar unha maior participación das mulleres nos máximos órganos de decisión nas empresas.