O alcalde de Vigo, Abel Caballero, criticou este luns os orzamentos que presentou a Xunta para 2020 porque, no que respecta aos investimentos previstos na cidade olívica, son “un escándalo” e unha mostra de que o goberno galego está “a tomar o pelo” aos vigueses.
O rexedor trasladou a súa “preocupación” porque as contas autonómicas do próximo ano non reflicten partidas suficientes para, por exemplo, a ampliación do Ifevi ou a construción do novo gran centro de saúde na rúa Lalín, e que a propia delegada da Xunta, Corina Porro, anunciou a pasada semana.
Así, Abel Caballero constatou que a Xunta “non quere ampliar o Instituto Feiral para Conxemar“, porque dita ampliación necesitaría un investimento duns 5 millóns e as contas de 2020 prevén unha partida de 100.000 euros. “Se a Xunta non os pon, buscaremos nós os recursos, e faremos a ampliación á marxe da Xunta”, proclamou o alcalde.
Por outra banda, tamén criticou que, para o novo centro de saúde anunciado o venres, que “aínda non existe pero xa ten nome”, destínanse 150.000 euros, unha partida “astronómica”, segundo ironizou, para unha actuación que requirirá “millóns e millóns” de euros para acondicionar un dos edificios dos xulgados.
A estas críticas, sumou tamén o feito de que o goberno galego non contempla recursos para cubrir “nin un só patio dos colexios públicos” da cidade, unha actuación da que se está facendo cargo o Concello; así como a ausencia de partidas para construír un IES en Navia, ou a intención de manter o novo centro de saúde de Bouzas en formato “mini”.
DÉBEDA DE 1.738 MILLÓNS
Segundo Abel Caballero, a poboación de Vigo é “case o 12 por cento” da de Galicia e, por tanto, ese a proporción que lle corresponde nos investimentos autonómicos. “Neste orzamento o investimento en Vigo é de 36 millóns, e terían que investir máis de 160 millóns”, denunciou.
O alcalde foi máis aló e estimou o investimento que a Xunta deixou de realizar na cidade desde que Feijóo é presidente e que, segundo os seus cálculos, ascende a 1.738 millóns de euros. “Débennos 1.738 millóns que están nalgún sitio, en Vigo non. E quero que os paguen”, proclamaron Abel Caballero, quen engadiu que “desde que hai unha nova delegada, é aínda peor”, en alusión a Corina Porro.
