O nivel de ocupación hoteleira de Vigo no mes de setembro ascendeu ao 83,3 %, un 11 % máis que no mesmo mes do ano pasado, segundo informou este venres o alcalde, Abel Caballero, quen proclamou que as taxas de ocupación e de visitantes á cidade están nun nivel “imposible de imaxinar hai tan só un ano”.
Así, nunha rolda de prensa, o rexedor olívico celebrou que os datos de turismo en Vigo marcaron “unha marca sen precedentes”. “O que sucede co turismo nesta cidade é un caso de estudo, incrementouse en taxas inconcibibles“, apuntou Abel Caballero, quen explicou que o 11,7 por cento dos visitantes de setembro procederon doutros lugares de Galicia, mentres que un 57,8 por cento fixérono do resto de España, e un 30,5 por cento eran visitantes internacionais (fundamentalmente de Portugal).
O primeiro edil vigués sinalou que o seu obxectivo é “seguir crecendo” e, a ese respecto, incidiu en que está por vir “o período alto” de afluencia turística que, “agora é o Nadal”. “De súpeto, en dous anos, transformamos Vigo. Dunha cidade cun turismo feble, a unha cidade fundamentalmente turística”, proclamou.
