Os traballadores de Vulcano continúan a súa marcha cara a Santiago, onde este venres esperan ser recibidos polo conselleiro de Economía, Emprego e Industria, Francisco Conde; un encontro no que, de confirmarse, reclamarán ao mandatario que “cumpra a súa palabra” e “busque investidores” do estaleiro vigués, que se atopa en proceso de liquidación.

Este xoves, ao seu paso polo municipio pontevedrés de Pontecesures, os traballadores recibiron o apoio das deputadas Yolanda Díaz (En Común) e Luca Chao (Común da Esquerda), que instaron aos Gobernos central e autonómico a implicarse na “superviviencia” deste estaleiro “centenario” e “unha icona do país”.

O portavoz do comité de empresa, Nicolás Sangabriel, recoñeceu que non existe confirmación de que vaian ser recibidos polo titular de Economía, ao que queren reclamar que “cumpra” co seu compromiso de buscar investidores.

Para Yolanda Díaz, tanto o Goberno central como a Xunta deben “reflexionar” sobre un sector estratéxico “clave” para a economía galega como é o naval, pois “non atender esta situación é dicir que deixarán caer a unha parte de nós”.

“Sería un erro catastrófico que as administracións implicadas deixen caer este estaleiro”, subliñou a deputada, que insta a Feijóo e a Pedro Sánchez a “pór o mesmo interese en Vulcano como teñen noutras empresas”.

Tras lembrar que o presidente do goberno en funcións estará en Galicia o vindeiro sábado para participar nun foro na illa da Toxa (Pontevedra), Yolanda Díaz reclamou a Sánchez que “mova as súas pezas” e “rescate” este estaleiro “como Francia, Alemaña ou Italia fan cos seus”.

Pola súa banda, a parlamenataria de Común da Esquerda Luca Chao cualificou de “drama” a posible desaparación de Vulcano, “un estaleiro fundamental para Vigo” cuxos problemas se suman aos que atravesa o sector naval en Galicia, como as auxiliares de Navantia ou Barreiras.