Unha traballadora eventual de PSA Vigo despedida terá que ser readmitida, despois de que os tribunais considerasen nulo o seu despedimento. A sentenza tamén obriga a que se reincorpore á planta como traballadora indefinida.
O portavoz do sindicato CUT na planta, Vítor Mariño, acompañado pola propia traballadora, explicou este xoves ás portas da factoría que esta operaria encadeou varios contratos temporais “en fraude de lei”, tal e como se recolle na sentenza.
A empresa modificou o seu nivel profesional e rebaixou o seu salario (pasou dun nivel 4 a un nivel 1B) no seu último contrato eventual, que concluíu xusto dous días antes da celebración do xuízo pola demanda interposta pola traballadora.
A resolución do xulgado sinala que “a temporalidade do contrato de traballo é plenamente fraudulenta, posto que non se causalizaron debidamente os diferentes cambios de circunstancias que se foron sucedendo”, e a CUT denunciou que a utilización deste tipo de contratos, “con cláusulas empregadas de forma abusiva e fraudulenta” é “unha constante” na fábrica viguesa.
Tamén criticaron que a empresa “abusa” da contratación temporal para “mover funcionalmente” a traballadora segundo as necesidades da planta, pero dentro dunha “actividade permanente”.
Por iso, informaron, a Xustiza deu a razón á empregada, polo encadeamento de contratos eventuais e, segundo a CUT, ábrese a porta “a que moitas persoas en situación de eventualidade poidan ter a posibilidade de regularizar a súa situación” na fábrica viguesa.
