O PP presentará unha moción no pleno da corporación municipal de Vigo e unha proposición non de lei (PNL) no Parlamento de Galicia para demandar ao Goberno central que autorice a nova subestación eléctrica da cidade olívica.

O portavoz do Grupo Municipal Popular, Alfonso Marnotes, incidiu na necesidade de dotar desta subministración de enerxía ás plantas viguesas para que poidan competir en igualdade de condicións que as situadas noutras partes da Península.

Así mesmo, acusou o alcalde, Abel Caballero, de non pronunciarse ante o feito de que non se autorizou a pesar de que, no seu momento, asegurou terlla solicitado ao secretario de Estado de Enerxía, José Domínguez.

A concelleira e deputada autonómica Teresa Egerique explicou que este xoves se presentará a PNL no Parlamento de Galicia co obxectivo de instar á Xunta a demandar ao Goberno central o cumprimento do Plan 2015-2020 de Rede Eléctrica de España, no que se inclúe a subestación.

Ademais, lembrou que foi o Executivo presidido por Mariano Rajoy o que engadiu este proxecto ao plan de Rede Eléctrica de España vixente.

Mentres, lamentou que Vigo sexa a “única gran cidade española sen conexión a 220kv”. Así, contrapuxo esta situación co feito de que Zaragoza, onde se sitúa unha planta de Opel, si dispoña deste servizo e, a cidade olívica, que conta cunha fábrica de PSA Peugeot Citroën, non.