O último tramo da Autovía do Morrazo, a AG-46, entrou en funcionamento na tarde deste venres, coa apertura de case catro quilómetros entre as ligazóns de Meira e Cangas.

O presidente da Xunta, Alberto Núñez Feijóo, destacou no acto de inauguración que esta infraestrutura é “moi necesaria” para as 100.000 persoas que viven no Morrazo. “Cumprimos coa palabra dada e hoxe a Autovía do Morrazo é unha realidade”, sentenza.

A conversión en autovía do corredor do Morrazo sumou un orzamento de 55 millóns de euros e consta dunha lonxitude de 11 quilómetros, tras realizarse obras repartidas en tres tramos durante o tres últimos anos.

“Entendiamos que era noso deber mellorar as condicións de seguridade viaria, vertebrar o noso territorio, xa que para esta comarca conectarse con Vigo e Pontevedra é clave“, afirma.

POSTA EN VALOR DO CASTRO DE MONTEALEGRE

O presidente da Xunta avanzou tamén que se culminará a posta en valor do Castro de Montealegre, a través dun proxecto de escavación que desenvolverá o departamento de Patrimonio Cultural.

“E tamén desenvolveremos esa nova solución singular articulada pola Axencia Galega de Infraestruturas para garantir a total estabilización do noiro do ramal de Cangas desta autovía, que consistirá na execución dun falso túnel para evitar novos desprendementos”, agregou.