O Peugeot 2008, fabricado na planta viguesa de Stellantis, situouse na lista dos 10 modelos máis vendidos en España no que vai de ano, ao ocupar a novena posición. Unha lista que segue liderando o Dacia Sandero, sendo o turismo máis escollido entre os condutores españois entre xaneiro e setembro, con 25.926 unidades matriculadas, malia recortar as súas vendas nun 9,8%.
Segundo os datos de peche de mes publicados polas patronais de fabricantes (Anfac), concesionarios (Faconauto) e vendedores (Ganvam), o Sandero sitúase por diante do Seat Ibiza e do Toyota Corolla, que contan con 22.020 e 19.257 matriculacións, respectivamente. O “top 5” dos modelos máis vendidos en España entre xaneiro e setembro complétano o Toyota C-HR, con 18.051 unidades (+18,9%) e o MG ZS, que con 16.708 operacións (-13,2%) ata setembro é o vehículo de orixe chinesa máis demandado, despois de que nos últimos meses anunciase que construirá unha fábrica en Ferrol.
Entre os dez máis comprados de 2026 tamén están o Seat Arona, con 16.406 rexistros (+0,5%) en sexto lugar; o Peugeot 208, con 16.327 anotacións (+4,8%); o Toyota Yaris Cross, con 15.738 vendas (+9,5%); no noveno posto está o “galego” Peugeot 2008, con 15.289 anotacións (+15,2%); e o Hyundai Tucson, que con 14.406 unidades (-7%) pecha a lista.
