A Cooperativa de Armadores de Pesca do Porto de Vigo (ARVI) reclamou cambios no marco empresarial e financeiro que afecta á frota española de altura e gran altura, cunha atención especial aos buques que operan en augas internacionais e de terceiros países. A entidade considera necesario facilitar investimentos que permitan renovar os barcos máis antigos e substituílos por unidades con maiores niveis de seguridade, eficiencia e sustentabilidade.

Estas propostas forman parte da declaración ARVI2026, presentada coincidindo co peche da XIII Conferencia Internacional da organización. O documento recolle unha serie de demandas dirixidas ás administracións españolas e ás institucións europeas para garantir, segundo sostén a cooperativa, a continuidade da actividade das empresas armadoras.

Un dos principais puntos expostos por ARVI é a creación dun marco empresarial adaptado ás características da frota de longa distancia. Neste sentido, a organización sitúa o Rexistro Especial como unha das ferramentas sobre as que debería asentarse a regulación futura para os barcos españois que desenvolven a súa actividade fóra das augas nacionais e comunitarias.

A cooperativa defende que este instrumento debe contribuír a crear “un marco empresarial específico para protexer a súa competitividade, favorecer o investimento e manter en España empresas, buques e emprego estratéxico”.

Outra das prioridades expresadas pola entidade viguesa é a renovación da frota. ARVI reclama tanto ao Goberno central como ás institucións comunitarias mecanismos que permitan financiar a substitución de unidades que quedaron desfasadas por novos buques adaptados ás actuais esixencias tecnolóxicas, ambientais e de seguridade.

A cooperativa vincula esta modernización coa necesidade de manter a actividade das empresas pesqueiras españolas a longo prazo. O sector vén situando nos últimos anos a renovación dos barcos e a transición enerxética entre os asuntos centrais para o futuro da pesca de longa distancia, unha cuestión que ARVI tamén abordou en anteriores edicións da súa conferencia internacional.

A organización, con sede no Porto Pesqueiro de Vigo, agrupa actualmente 160 buques pertencentes a 128 empresas armadoras, segundo os datos publicados pola propia entidade.

ARVI PON O FOCO NO RELEVO XERACIONAL

A declaración tamén incorpora como prioridade a incorporación de xente nova ao sector pesqueiro. A organización pide mellorar as posibilidades de formación e facilitar que as novas xeracións poidan acceder tanto aos empregos a bordo como á xestión das propias compañías.

“O futuro esixe mozos dispostos non só a traballar na pesca, senón a emprender e a liderar as súas empresas”, sinala ARVI, que relaciona o relevo xeracional coa continuidade do tecido empresarial ligado á actividade extractiva.

A cooperativa considera que garantir a permanencia das empresas armadoras é unha condición necesaria para manter os buques operativos e preservar a capacidade pesqueira europea. Así o resume nunha das conclusións da declaración: “Sen empresas non haberá frota, sen frota non haberá pesca e sen pesca Europa será máis dependente e menos soberana”.