Empregados de Alten, empresa que traballa para a auxiliar automobilística BorgWarner, iniciaron este luns unha folga indefinida en rexeitamento aos despedimentos e á “ameaza de cesamento de actividade se non se retiran as demandas por cesión ilegal de traballadores”.

Cunha pancarta co lema ‘Contra a fraude na contratación en BorgWarner’, decenas de traballadores concentráronse este mediodía ante as instalacións da compañía en Porto do Molle, en Nigrán, onde permanecen encerrados desde o pasado xoves. Segundo informa a CIG nun comunicado, o persoal denuncia unha “campaña interna de chantaxes, coaccións e ameazas” posta en marcha en xaneiro pola dirección de Alten, “con coñecemento de BorgWarner”.

O conflito prodúcese despois de que a Inspección de Traballo ditaminase en 2024 a existencia dunha cesión ilegal de persoal por parte de Alten á multinacional automobilística. A raíz dese informe, moitos empregados presentaron demandas xudiciais para reclamar os seus dereitos laborais. “Agora, cando se aproxima a celebración dos primeiros xuízos, as compañías optaron por medidas de presión para impor a precariedade laboral”, sostén a CIG, que denuncia o despedimento de catro persoas e asegura que outras sete están baixo ameaza de final de proxecto se non retiran as demandas presentadas.