O Centro Tecnolóxico de Automoción de Galicia (CTAG) emitiu este venres comunicado, tras coñecerse que comunicou aos representantes dos traballadores a súa intención de negociar un ERE cun máximo de 150 despedimentos e un ERTE que afectaría potencialmente á totalidade do persoal.
CTAG sinalou que estas medidas veñen motivadas “pola actual situación económica e industrial do sector de automoción e a súa repercusión no mercado”. Respecto diso, sinalou que esa industria “atravesa un proceso de transformación sen precedentes, condicionado por unha combinación de factores económicos, tecnolóxicos, regulatorios e xeopolíticos”, entre os que destacou a transición ao vehículo eléctrico, as tensións comerciais internacionais ou a incerteza macroeconómica.
Con todo reivindicouse como “clave” no ecosistema industrial galego e sinalou que mantén o seu “firme compromiso” coa construción de novas oportunidades e “atracción de novos proxectos en Galicia”. Tamén reafirmou o seu compromiso coa súa “misión fundacional”, a de “contribuír ao aumento da competitividade do sector de automoción”, mediante a investigación, a innovación e a transferencia tecnolóxica. “Destacando a continuidade de proxectos estratéxicos e os investimentos en curso”, engadiu.
O centro tecnolóxico manifestou no comunicado que aborda o proceso de negociación que se abre agora “cun enfoque centrado no diálogo social”, buscando “solucións que minimicen o impacto” e con obxectivo de “asegurar a sustentabilidade e continuidade do centro a longo prazo”. Finalmente, a dirección do CTAG agradeceu “a responsabilidade e a profesionalidade do conxunto do persoal nestes momentos”, e reiterou a súa vontade de manter unha “comunicación aberta” durante todo o proceso de negociación.
