O Diario Oficial de Galica (DOG) publica este mércores un anuncio da Dirección Xeral de Estratexia Industrial e Só Empresarial da Consellería de Economía e Industria polo que se empraza ás persoas interesadas para ser notificadas por comparecencia sobre o expediente de expropiación forzosa dos bens e dereitos que se necesitan ocupar para a ampliación do Parque Tecnolóxico e Loxístico (PTL) de Valadares, en Vigo.

Segundo indica o DOG, de conformidade á lei, despois de tentada a notificación persoal nos termos establecidos, emprázase a uns 40 propietarios para ser notificados por comparecencia se así o desexan.

Nesta comparecencia darase a coñecer o contido íntegro do acordo para a expropiación e levará a cabo nas oficinas da Dirección Xeral, no complexo administrativo de San Lázaro, en Santiago de Compostela, entre as 09.00 e as 14.00 horas. “A eficacia desta notificación queda supeditada á súa publicación no taboleiro edictal único (TEU) do Boletín Oficial do Estado. Transcorrido devandito prazo sen efectuarse a comparecencia, a notificación entenderase producida desde o día seguinte ao do vencemento do prazo sinalado para comparecer”, sentencia o DOG.

Todo iso despois de que a finais do mes de marzo o DOG publicase a resolución pola que se aprobou definitivamente o proxecto de expropiación forzosa de máis de 140 parcelas con case 67.000 metros cadrados para a ampliación do PTL.