O comité de empresa de Levantina criticou este venres que a compañía queira marchar do Porriño “si ou si” porque “non lles interesa o granito” xa que “non é negocio”.

Nun comunicado, o comité, con representación dos sindicatos CC.OO., UGT e CIG, aseguraron que “se acaba o tempo para salvar máis de 100 empregos” como consecuencia do expediente de regulación de emprego (ERE) exposto por Levantina, o que supón cesar a súa actividade industrial no Porriño.

“Levamos dúas semanas de negociación no período de consultas e xa nos sobrou tempo para coñecer que a vontade desta dirección de Levantina é marcharse do Porriño si ou si. Para falar claro, sobramos todos. Din que non lles interesa o granito, que non é negocio”, engadiu o comité.

Tras asegurar que trataron de razoar coa dirección para que contemplen o mantemento da actividade industrial, as respostas foron: “É que non podemos, é que non é rendible, é que non nos interesa”.

“Ante este escenario non nos queda outra aos traballadores que tentar buscar un grupo investidor que queira continuar coa actividade industrial no Porriño e que nos permita salvar unha parte importante dos postos de traballo”, reivindicaron, lembrando que quedan 15 días para finalizar o período de consultas do ERE.

Todo iso despois de que Levantina anunciase no principio do ano a súa intención de iniciar un ERE por causas económicas, organizativas e de produción que afectará a 95 traballadores, dos 106 que hai na actualidade no Porriño. O obxectivo é cesar a súa actividade industrial no municipio.

“A compañía viuse abocada a esta situación debido ao impacto crítico na súa viabilidade producido pola crise do sector, derivada da drástica e continuada caída da demanda de pedra natural fronte a outros produtos sustitutivos na última década. O inicio deste proceso de ERE ten como obxectivo adaptar a estrutura de Levgranite á realidade do actual mercado internacional da pedra natural, e especialmente, á decreciente demanda de granito”, indicou a empresa.