“O que pasou o martes é unha vergoña e está claro que o poder fáctico da banca contrólao todo…Os bancos gañaron nos primeiros oito meses do ano máis de 13.400 millóns de euros, e queren seguir tendo beneficios, mentres todos estamos en recesión e cada vez hai máis traballadores empobrecidos. Teñen que ter beneficios porque son unha industria, pero non á conta dos consumidores”.

Así resumiu a portavoz da plataforma antidesahucios PAH Vigo-Baixo Miño, Carlota Pérez, a quen beneficia a sentenza do Tribunal Supremo que obriga aos clientes a pagar o imposto das hipotecas –taxa sobre os actos xurídicos documentados– . Por iso, esta entidade realizou unha cacerolada diante dos xulgados de Vigo para protestar contra esta “bochornosa” sentenza.

A PAH fixo un chamamento aos cidadáns a “saír á rúa” a “presionar” ante a banca e os fondos voitre, para evitar “pagar o pato”. Tamén criticou o anuncio dalgunhas entidades de que repercutirá o pago do imposto subindo os tipos de interese ás hipotecas. “Estamos nas súas mans, e o triste é que o Tribunal Supremo non defende aos cidadáns”, denunciou Pérez.

“Os bancos machucan por todos lados aos consumidores, e o que se impón é un cambio na lei hipotecaria”. Parécenos moi ben que agora fagan un real decreto, pero tiñan que facelo antes, e non vale esta solución de que pague a metade uno e a outra metade o outro”, advertiu.