O comité de empresa de Vitrasa, concesionaria municipal do transporte público de Vigo, anunciou que retomará as mobilizacións o vindeiro venres, día 25 de outubro, ante a situación de bloqueo que se mantén na negociación do novo convenio.

Tal como explicou a representación dos traballadores, fai sete meses finalizaron as mobilizacións que duraron 108 días, tras chegar a un acordo co obxectivo de retomar a negociación para desbloquear o conflito aberto en xaneiro de 2021. Para negociar, a empresa aludía á necesidade de recuperar viaxeiros e cobrar o reequilibrio polas perdas derivadas da pandemia.

“A día de hoxe estas premisas cumpríronse”, subliñou o comité, indicando que se recuperaron os viaxeiros previos á alerta sanitaria e que Vitrasa cobrou uns 18 millóns de euros de compensación, “pero continúa negándose a chegar a acordos co persoal por estes anos pasados”. “A oferta da empresa unicamente fai referencia aos anos 2024 ao 2027, deixando 2021, 2022 e 2023 cunha perda de poder adquisitivo bastante significativa”, lamenta o comité nun comunicado.

Ademais, non contempla novos tempos de percorrido, aínda que na actualidade son “insuficientes” e “non permiten” aos empregados realizar os seus descansos. A pesar da multitude de reunións mantidas, o 1 de outubro Vitrasa comunicou que non podía mellorar a súa última oferta, polo que non se propuxo nova data para negociar. Por iso, agora os empregados planean unha nova mobilización o 25 de outubro, pedindo desculpas de antemán á cidadanía polo trastorno que isto pode volver supor.