O Porto de Vigo espera lograr o seu obxectivo de pechar 2023 como “o mellor ano da súa historia” tras aumentar un 13,3 % o seu tráfico total en xuño, respecto ao mesmo mes de 2023, superando as 500.000 toneladas. Así o sinalou o presidente da Autoridade Portuaria, Carlos Botana, tras o consello de administración da entidade levado a cabo este venres, no cal se analizaron os “bos resultados” rexistrados durante o primeiro semestre, cun incremento do 10,4 % no tráfico acumulado ata xuño, con máis de 2,61 millóns de toneladas, superando aos anos do “boom económico” (2007 e 2008).

En concreto, os grupos de mercadoría que condicionan positivamente o tráfico portuario neste primeiro semestre son os tráficos do sector da automoción, a pesca conxelada, os metais e as súas manufacturas, as froitas, hortalizas e legumes, os produtos químicos e as madeiras. Só en xuño, o tráfico de mercadorías subiu un 16 %, sendo o segundo mellor mes de xuño da historia só por detrás de 2007, “grazas ao bo comportamento da pesca conxelada, as froitas, hortalizas e legumes, os metais e as súas manufacturas, a madeira, as pezas de automoción, os produtos químicos, as conservas, os alimentos e outros materiais de construción”.

En canto á principal mercadoría que xestiona o Porto, os vehículos, hai un aumento no tráfico acumulado do 3,4 %, destacando a subida con países como Reino Unido, Italia, Turquía e Marrocos. “O tráfico de vehículos acumulado ao mes de xuño de 2024 conforma, desta forma, o mellor período acumulado a xuño da serie histórica do Porto de Vigo”, subliñaron. Entre outros asuntos, Botana presentou ao consello de administración a tramitación ambiental ordinaria da Delimitación dos Espazos e Usos Portuarios (DEUP) do Porto de Vigo, que se someterá a información pública e a consultas ás administracións afectadas por un período de 45 días hábiles. Unha vez concluída a fase de tramitación ambiental, tocaralle a quenda á tramitación administrativa ata a aprobación definitiva do documento mediante orde ministerial.