Iberia Express volverá conectar Vigo con Tenerife este verán, con voos directos desde mediados deste mes de xuño ata principios de setembro, segundo informou a aerolínea ‘low cost‘ nun comunicado. En concreto, os luns e os venres programou un voo sen escalas desde a cidade olívica ao aeroporto dos Rodeos, en Tenerife Norte, con capacidade para 180 pasaxeiros, o que supón ao redor de 9.000 prazas dedicadas a esta ruta na tempada estival.

“Os nosos clientes valoran moito estes voos que operamos durante os meses de verán de maior demanda e, por iso, recuperámolos: para tentar ofrecerlles o mellor servizo e as conexións máis eficientes que lles permitan gozar ao máximo das súas vacacións”, destacou a directora comercial de Iberia Express, Isabel Rodríguez. Así, na web da compañía xa están á venda os billetes, cun prezo por traxecto que supera os 150 euros na maioría das datas ofertadas.