O Tribunal Superior de Xustiza de Galiza (TSXG) anulou o calendario laboral de 2023 do persoal de Ilunion (centro especial de emprego do grupo ONCE) nas compañías da automoción Stellantis (Vigo), Benteler (Mos e Valadares) e Lear (Valadares) ao “incumprir” o convenio autonómico e estatal de CEE.

Segundo informou a CIG, a dirección de Ilunion impúñalle ao seu persoal as vacacións de Stellantis, “vulnerando” os convenios colectivos da CEE que establecen que se deberán repartir como máximo en dous períodos distintos de 16 días de duración, un deles a gozar durante o verán, pero a empresa “obrigaba a coller unha semana en decembro”.

En consecuencia, os delegados sindicais da CIG presentaron unha denuncia ante o Xulgado do Social de Vigo que deu a razón á empresa. O TSXG estimou o recurso da central sindical e anulou os calendarios laborais. Contra o fallo do Alto Tribunal galego cabe recursos de casación ante o Tribunal Supremo. Para a CIG a decisión xudicial “demostra unha vez máis” os “constantes incumprimentos” en materia laboral que os traballadores de Ilunion “levan anos denunciando”.