O Porto de Vigo pechou o mes de febreiro cos mellores datos de tráficos da súa historia e manténdose por segundo mes como a primeira terminal de España no que respecta á automoción, segundo o balance presentado este venres no Consello de Administración da Autoridade Portuaria. Tras o Consello, o presidente do Porto, Carlos Botana compareceu en rolda de prensa e confirmou que, no segundo mes do ano, o tráfico total na terminal olívica alcanzou as 414.227 toneladas, o que supón un aumento do 16,09 % con respecto ao mes de xaneiro e un incremento acumulado anual (xaneiro e febreiro) do 8,04 %.
Con respecto á mercadoría xeral, a subida de febreiro foi do 21,14 % e a subida acumulada do 13,49 %; mentres que a pesca fresca experimento un aumento do 2,24 % en febreiro e do 4,16 % en termos acumulados. Por mercadorías, o Porto de Vigo experimentou incrementos en automoción (un 54,8 % en febreiro e un 35,34 % acumulado), en abonos e pensos (un 61,18 % mensual e un 53,05 % acumulado), en conservas (29,11 % en febreiro e 14,25 % acumulado) ou pezas de automoción (133,47 % en febreiro e 121 % acumulado).
De feito, subliñou Botana, a terminal viguesa volveuse a situar, por segundo mes consecutivo como primeira de España en tráfico de automóbiles, por diante de Valencia e Barcelona. Tamén se rexistraron incrementos nos tráficos mensual e acumulado de colectores (26,28 % e 8,27 %, respectivamente). Na parte negativa, rexistráronse descensos nos tráficos de aceite de peixe (- 71,5 % mensual e – 49 % acumulado), carbóns e coque (- 40,85 % mensual e – 28 % acumulado), granito bruto (- 18,5 % mensual e – 29,1 % acumulado), metais (- 31 % mensual e – 15,3 % acumulado) ou a pesca conxelada (- 2 % mensual e – 3,39 % acumulado).
Finalmente, Carlos Botana confirmou que o Consello de Administración deu luz verde este venres á concesión de 245.000 metros cadrados a Stellantis na terminal de Bouzas. Nese espazo, lembrou, construirase o novo silo para automóbiles, coa previsión de que as obras comecen no último trimestre deste ano e finalicen a finais de 2026.
