Sindicatos reivindicaron este xoves o “seguimento masivo” da folga nas escolas infantís privadas ou de xestión indirecta durante a primeira xornada dos paros convocados, que se volverán a repetir o 25 de outubro e os días 8 e 15 de novembro.

Nun comunicado, a CIG explicou que esta medida pretende reclamar un convenio “digno” e uns salarios “xustos” para as traballadoras, na súa gran maioría mulleres.

Para visibilizar estas demandas, centenares de empregadas concentráronse en Vigo e na Coruña para denunciar o “bloqueo” que a patronal está a levar a cabo na negociación do novo convenio, xa que no anterior as táboas salariais quedaron por baixo do salario mínimo interprofesional.

Só en Galicia, o sector agrupa a unhas 2000 persoas e a uns 200 centros, que optaron pola folga tras máis dun ano no que se produciron ata 10 reunións “nas que nada se avanzou”, segundo lamenta a CIG.

Pola súa banda, desde Comisións Obreiras, convocante da folga, cifraron nun 80% o seguimento do paro, aínda que criticaron a posición dalgunhas empresas privadas, que estableceron servizos mínimos para a folga deste xoves, debido a que si estaba permitido para aquelas gardarías dependentes dos concellos, ao ser públicas ou semipúblicas.