A Xunta de Galicia recibiu 13 ofertas de empresas para executar o aparcadoiro disuasorio para o fomento do vehículo compartido en Domaio, no concello pontevedrés de Moaña, que suporá un investimento de máis de 877.000 euros.
A Consellería de Infraestruturas e Mobilidade prevé comezar no verán as obras deste aparcadoiro que se situará nas proximidades da ligazón de Rande da estrada PO-551, como prolongación do xa existente na marxe dereita.
Segundo informou o Goberno galego, contará cun total de 75 prazas, dúas delas para vehículos conducidos por persoas con mobilidade reducida. Tamén se instalarán tres puntos de recarga para coches eléctricos.
A actuación forma parte dos proxectos promovidos polo Executivo autonómico, financiados con fondos europeos, para a transformación da mobilidade nas contornas urbanas.
