O alcalde de Vigo, Abel Caballero, confirmou este xoves que o Concello xa traballaba coa organización do Marisquiño para buscar un novo emprazamento para o Dirt Jump dentro da cidade.
Todo iso despois de que o festival anunciase este pasado mércores que estaba a buscar un espazo para esta proba deportiva ante a “falta de resposta” do Porto de Vigo á petición formulada para celebrar a actividade no seu lugar habitual, o Paseo das Avenidas.
En rolda de prensa, o rexedor criticou á Autoridade Portuaria e en concreto ao seu presidente, Jesús Vázquez Almuiña, acusándoo de “non estar á altura do que a cidade require”.
Por iso, desde o goberno local xa se está “buscando unha solución” porque, segundo Caballero, O Marisquiño continuará en Vigo e este ano terá “a mellor edición que houbo nunca na historia”.
“Falaremos con eles e veremos as necesidades, pero garanto que haberá un espazo en Vigo para o Dirt Jump“, subliñou, despois de encomiar a “gran experiencia” da organización e a forma de entender o festival que teñen.
