InicioDeportesDetido un dos neonazis líderes de Ultras Sur por agresión a un...

Detido un dos neonazis líderes de Ultras Sur por agresión a un seareiro celtista

Formaba parte dos aproximadamente 120 ultras que causaron feridos e desfeitas nas inmediacións de Balaídos antes do último Celta-Real Madrid.

PUBLICADO O

- Advertisement -

Axentes da Policía Nacional detiveron un dos líderes máis destacados de Ultras Sur pola súa presunta participación na agresión dun afeccionado celeste na previa do partido de fútbol entre Celta de Vigo e Real Madrid, celebrado o pasado 2 de abril.

Segundo as investigacións realizadas, os axentes constataron que un grupo de ultras neonazis formado por aproximadamente 120 individuos se trasladou desde Madrid ata a cidade de Vigo co obxectivo de enfrontarse a seguidores celtistas antes da celebración do partido. Entre eles atopábase o arrestado, Antonio M., alcumado como ‘Niño skin’, segundo fontes da investigación.

O arresto prodúcese pola súa presunta participación en diferentes delitos de lesións, un deles agravado, e danos intencionados nun establecemento de hostalaría, segundo informou a Policía Nacional.

Como consecuencia dos altercados, ademais, 117 persoas foron propostas para sanción por vulnerar a Lei 19/2007, do 11 de xullo, contra a violencia, o racismo, a xenofobia e a intolerancia no deporte. Estas sancións levarían unha multa de entre 3.000 e 6.000 Euros e/ou a prohibición de entrada a recintos deportivos de seis meses a un ano.

AGRESIÓN EN LOCAIS HOSTALEIROS

Para desprazarse a Vigo os ultras usaron vehículos particulares e de aluguer e, tras agruparse nos arredores do Estadio Municipal Abanca Balaídos, dirixíronse a dous locais de hostalaría frecuentados por afeccionados do equipo local.

Unha vez no lugar, un grupo composto por cinco agresores romperon o cristal da porta de entrada dun destes locais para, acto seguido, agredir a dous clientes con puñadas e patadas. A posterior investigación determinou que o detido, ademais de participar no altercado, sería o responsable de golpear a un dos afeccionados cunha botella de vidro na cabeza, provocándolle lesións graves polas que necesitou asistencia sanitaria.

A rápida intervención policial, grazas ao dispositivo de seguridade establecido con motivo do encontro e a previsión de posibles enfrontamentos entre as afeccións, evitou que se producisen máis altercados, segundo a Policía.

Os axentes lograron o control total dos agresores e procederon á súa identificación e á retirada das entradas para o acceso ao partido de fútbol. Tras iso foron acompañados ata as aforas da cidade.

INVESTIGACIÓN

De forma inmediata iniciáronse as xestións e comprobacións tendentes ao esclarecemento dos feitos e á identificación plena dos autores. Para iso iniciouse unha especial colaboración entre axentes especializados en radicalismos violentos e violencia no deporte da Brigada Local de Información da Comisaría de Vigo-Redondela e a Brigada Provincial de Información de Madrid, coordinados pola Comisaría Xeral de Información.

As xestións practicadas levaron finalmente á identificación do presunto autor, quen resultou ser un membro destacado do grupo neonazi Ultras Sur, coñecido polos investigadores por protagonizar feitos similares e que se erixía como líder do citado grupo. O pasado venres, e debido á presión policial ao ter coñecemento que estaba a ser buscado polos axentes, o investigado entregouse nunha dependencia policial de Madrid.

ÚLTIMAS

Un vehículo choca con outro e resulta envorcado en Vigo

O barrio vigués de Teis rexistrou na mañá deste venres un accidente de tráfico,...

Abel Caballero asegura que pedirá a Sánchez adiantar os prazos do AVE Vigo-Oporto, porque seguirá “defendendo a Vigo contra quen faga falta”

O presidente da Xunta, Alfonso Rueda, botou en cara ao xefe do Executivo central, Pedro...

Detidos os dous supostos autores dun roubo nunha empresa de enxeñaría de Teis, facéndose con material por valor de 21.000 euros

A Policía Nacional detivo en Vigo aos dous supostos autores dun roubo con forza nunha empresa...

Ciencia en galego, Youtubeiros científicos e os perigos das Fakenews no ciclo ‘Ciencia de ida e volta’

Coa celebración do Día da Ciencia en Galego e dos días mundiais da Vida Silvestre,...