A I Copa da Asociación de Fútbol Gaélico celebrouse este sábado en Mazaricos coa vitoria final do Keltoi, procedente de Vigo, sobre o equipo Fillos de Breogán, da Coruña, na final celebrada no campo de fútbol de Pino de Val.
Na Copa, organizada polo Mazaricos CF en colaboración co Concello, tomaron parte os Fillos de Breogán, Estrela Vermelha, Keltoi, Lume de Beltane, Cambados, Auriense e un combinado formado por xogadores do Irmandinhos e Herdeiros de Dhais.
O concelleiro de Deportes, Jorge Villar, agradeceu a súa implicación aos equipos participantes e manifestou que “foi unha xornada moi agradable na que demos a coñecer un equipo distinto”.
O edil adiantou que con esta copa veñen de asentarse as bases para desenvolver unha afección propia para este deporte en Mazaricos. Pola súa banda, o alcalde, Juan Blanco, agradeceu tamén a presenza de todos os equipos participantes e saudou iniciativas coma esta “que diversifican o mundo do deporte mazaricán”.
