Día de celebración no ciclismo galego logo de que o tudense David Fernández se proclamara campión a nivel estatal na categoría de enduro o pasado domingo. O rider da escola de ciclismo A.D. AVANZA conseguiu conquistar o título tras unha dura proba nos Pirineos que pon á selección galega de ciclismo no máis alto do podio estatal.

Segundo explica o corredor, a categoría enduro foi a primeira modalidade en poñerse en xogo nesta tempada especialmente atípica. “A falta de probas de este ano facía que os riders visen incrementadas as súas inquedanzas e ansias de poñer a proba o seu nivel físico ante a falta de competicións por culpa da pandemia do COVID 19“, explica.

UN DEPORTE ARRISCADO

O trunfo do Fernández suma un galardón máis á distinguida carreira dun deportista que o ano pasado xa se coroara como líder do enduro galego. O enduro configúrase como unha modalidade de ciclismo de montaña especialmente esixente e que reviste certo risco, xa que implica atravesar zonas boscosas “de grande dificultade” e a “gran velocidade”, segundo destaca unha páxina especializada no sector.