Cidades e vilas galegas fervían na mañá deste sábado. 50 días despois de decretarse o Estado de Alerta, o Goberno central permitiu a toda a poboación saír á rúa por franxas horarias. E Vigo non foi unha excepción. Desde primeira hora da mañá eran moitos os deportistas e paseantes que se deixaron ver polas principais rúas da cidade.

Así, de 6 ata ás 10 da mañá é a franxa para deportistas e persoas maiores de 14 anos. O deporte poderase practicar de maneira individual, unha vez ao día, sen contacto con outra persoa e a limitación de distancia poraa a fronteira do teu municipio.

De 10 a 12 da mañá é o momento para os maiores de 70 anos e persoas dependentes. As persoas dependentes poderán saír co seu coidador, unha vez ao día como máximo. De 12 a 19 da tarde é o momento dos nenos menores de 14 anos que poderán saír, como xa fan desde o pasado domingo, pero só neste horario, de 12:00 a 19:00 horas.

De 19 ao 20 da tarde volverán os maiores de 70 anos e persoas dependentes que non saísen no seu horario matinal permitido. Pechan o día as persoas que poden abrilo para facer deporte individual e paseos coas restricións para adultos maiores de 14 anos que, igualmente, non saísen pola mañá.

Á marxe destas opcións quedan as persoas con síntomas ou afectados polo coronavirus, que deberán permanecer no seu domicilio. Tampouco poden saír os residentes en centros sociosanitarios de maiores.

Mentres, os municipios con menos de 5.000 habitantes, ou aquelas entidades menores de poboación con menos de 5.000 habitantes, non estarán sometidos a estas limitacións, e poderán realizar as actividades permitidas a calquera hora do día.