O Celta de Vigo anunciou na noite de domingo a destitución de Fran Escribá como adestrador do primeiro equipo, despois de que o seu equipo encadease ante o Xetafe a súa cuarta derrota consecutiva que o mantén en postos de descenso directo.

O club vigués busca xa un substituto que podería anunciarse nos vindeiros días. De feito, nos últimos días xa se mantiveron contactos con Javi Gracia, Abelardo e Eusebio Sancristán, o último adestrador en entrar na terna de candidatos para suplir a Fran Escribá.

No seu comunicado, o club desexa transmitir o seu “máis sincero agradecemento” tanto ao adestrador valenciano como aos seus colaboradores polo seu “traballo, profesionalidade e esforzo” demostrado durante a súa etapa no club, e deséxalle “o maior dos éxitos” no futuro, tanto no profesional como no persoal.

Escribá chegou o pasado mes de marzo para substituír ao portugués Miguel Cardoso, e ampliou o seu contrato até xuño de 2020 despois de conseguir a permanencia do Celta na máxima categoría. É cesado na duodécima xornada, despois de que o seu equipo sumase tan só nove puntos.