Celta de Vigo e Deportivo da Coruña empataron este sábado a un en Balaídos nun partido no que faltou o fútbol e sobraron entradas duras. O do derbi quedou niso, no nome, porque foi un dos derbis máis pobres dos últimos anos, quizais, porque ningún dos dous equipos se xogaba xa nada.
A primeira parte foi claramente celeste, mentres que a segunda dominou o Deporivo. De feito, o equipo vigués puido deixar o partido sentenciado na primeira metade pero non estivo acertado nas contras.
O Celta adiantouse no minuto 13 logo dunha acción na que Pione puxo un centro que rematou Maxi Gómez, logo dunha moi mala saída de Rubén. Pouco despois puido chegar o segundo, pero desta volta Rubén estivo máis fino e apañou o tiro de Maxi.
Logo do descanso, Clarence Seedorf deixou no vestiario a Emre Çolak para dar entrada ao uruguaio Fede Valverde. E comezou outro partido, máis duro e máis do Deportivo. Maxi Gómez tivo que deixar o terreo de xogo despois dunha dura entrada de Schär. No seu lugar entraría Lucas Boyé.
GOL ANULADO
No minuto 70 o colexiado invalidou un gol de Sisto. O partido ía a menos. Unzué retirou a Brais Méndez para dar entrada ao Tucu, e case sobre o tempo tívose que retirar Wass lesionado, entrando no seu lugar Roncaglia. Xusto despois chegaba o gol do empate, obra de Lucas Pérez.
O gol serviu para que o Deportivo saíra de Balaídos con certa honra. Agora haberá que agardar, cando menos, un ano para ver outro derbi en primeira. Iso, sempre e cando, os de Coruña suban de categoría.
