O RC Celta e o Concello de Vigo formalizaron a concesión administrativa de Abanca Balaídos por un período de 50 anos, prorrogable ata un máximo de 75 anos, tras un acto celebrado no propio estadio entre a presidenta do club celeste, Marián Mouriño, e o alcalde da cidade, Abel Caballero.
“Como lembranza deste día, Marián Mouriño fíxolle entrega ao alcalde de Vigo dunha maqueta exclusiva do estadio, símbolo da estreita vinculación entre a instalación, o Celta e a cidade”, subliñou este domingo a entidade celeste nun comunicado de prensa. “A formalización do acordo supón un fito histórico para Balaídos, un recinto que forma parte inseparable da historia do Celta e da identidade de Vigo e que afronta agora unha nova etapa coa vocación de converterse nun espazo deportivo, social e de lecer”, engadiu a nota.
Ademais, Mouriño admitiu estar “moi emocionada de facer realidade” o que se anunciara “hai uns meses”. “Pero que tiña que seguir, por suposto, o procedemento de exposición pública e que hoxe comentabamos sen ningunha alegación”, advertiu a presidenta do Celta.
“Isto é un convencemento de toda a cidade de que é importante para Vigo, de que é importante para o Celta contar con esta concesión de 50 máis 25 anos que nos permite facer deste estadio un dos mellores estadios do mundo, un estadio que se fai con todas as comodidades e que imos adaptando e construíndo xuntos para que todo o mundo sinta que é o seu estadio e que o representa como celtismo”, engadiu Mouriño.
“Estamos moi, moi contentos, moi agradecidos co Concello, coa corporación. O traballo foi de todas as partes e de todos os equipos durante moitísimos meses, anos e reunións, pero unha das primeiras cousas que dixen era sentar as bases para os próximos 100 anos do club, estes son 75. Con que, moi orgullosa e moi contenta de regalarnos hoxe este agasallo enorme para o celtismo”, concluíu Mouriño.
