A Comisión Permanente da Comisión Estatal contra a Violencia, o Racismo, a Xenofobia e a Intolerancia no Deporte propuxo unha multa de 350.000 euros e a clausura de ABANCA Balaídos durante tres meses por non impedir que se bloqueasen vías de evacuación e por permitir a entrada dun grupo de polo menos 36 persoas que non pasou ningún tipo de control durante o encontro de LaLiga EA Sports ante o Raio Vallecano.

Durante a súa reunión na sede do Consello Superior de Deportes (CSD), Antiviolencia propuxo estas sancións ao club galego por “non establecer as necesarias medidas de control de acceso e permanencia de espectadores e impedir que se ocupasen as vías de evacuación da bancada Marcador Baixo, que estiveron colapsadas por afeccionados durante todo o encontro“.

Ademais, eleva a multa “por permitir que un empregado do club facilitase o acceso a numerosos afeccionados desde a bancada de Río Baixo á bancada de Marcador Baixo; e, ademais, que se permitise o acceso ao estadio dun grupo de polo menos 36 persoas desde un portal de acceso de vehículos ao interior do estadio cara á bancada de animación, todo iso sen ningún tipo de control nin observación das condicións de acceso”.