O presidente da Xunta, Alfonso Rueda, pediu este martes que non se utilice a polémica sobre a elección de sedes do Mundial 2030 para a confrontación política e subliñou que o obxectivo é que Vigo entre na listaxe de sedes, onde xa está A Coruña, polo que apelou a “unir forzas”. En declaracións aos medios durante un acto en Vigo, o titular do Executivo autonómico sinalou que é necesario “dar explicacións e saber o que pasou” pero engadiu que “non leva a ningunha parte utilizar isto para un enfrontamento máis”, en alusión á esixencia do goberno municipal vigués, que reclama a Rueda que se poña á fronte para pedir explicacións á Real Federación Española de Fútbol (RFEF) sobre os criterios para seleccionar esas sedes e as supostas irregularidades que deixaron fóra ao estadio Abanca Balaídos.
Tras lamentar que se utilice esta situación para “marcar culpables externos”, o presidente galego lembrou que a Xunta xa anunciou en 2022 que colaboraría economicamente coas sedes galegas que resultasen elixidas, cunhas condicións xa fixadas. “É o que seguimos dicindo. Oxalá poida haber dúas sedes en Galicia, e aí estará a Xunta colaborando”, sinalou. Sobre a moción aprobada no pleno de Vigo (co voto a favor do PSOE e a abstención de PP e BNG), na que se esixe a Rueda que pida explicacións á RFEF pola suposta manipulación das puntuacións, o presidente da Xunta sinalou que non é o único que pode pedir explicacións: “Tamén o presidente do Goberno pode pedilas, ou o ministro responsable de Deportes”.
En todo caso, insistiu en pedir que non se caia “na tentación da confrontación política con calquera asunto” e advertiu de que é “un erro” centrarse en xulgar como se levou a cabo o proceso, esquecendo o “resultado final” desexado, que é que Vigo poida ser sede do Mundial 2030. “Por suposto que é bo sabelo todo, pero o fundamental é manternos unidos. Onte vin unhas manifestacións que me gustaron pouco e que son o de sempre, e aí á Xunta non a van ver. Eu quero resultados, e os resultados pasan por unir forzas. Hai exemplos dabondo e eu quero tamén exemplos diso nesta cidade”, sentenciou.
