O goberno municipal de Vigo remitiu unha carta ao recentemente elixido presidente da Real Federación Española de Fútbol (RFEF), Rafael Louzán, para que aclare os criterios e baremos que rexeron a elección das sedes para o Mundial 2030, e polos que Vigo quedou fóra das cidades elixidas.

Na misiva, asinada polo concelleiro Javier Pardo, o Concello lembra que xa pediu esa información en xullo pasado á RFEF e, semanas despois, ao Comité Técnico da Candidura 2030. Segundo apuntou, a RFEF limitouse a constatar que Vigo quedara fóra, e o Comité apuntou que o motivo sería a obtención dunha puntuación inferior ao resto de sedes, en concreto, referíase a unha baixa valoración no apartado de ‘estrutura financeira’. Coa elección dun novo presidente neste organismo, Rafael Louzán, o goberno de Vigo entende que é “imprescindible” que, aras da “transparencia”, se coñezan cales son os criterios que se tiveron en conta para seleccionar as sedes do Mundial en España, unha cuestión que, a día de hoxe, “non foi aclarada”.

“É obvio que na actualidade o principio de transparencia na xestión dos recursos públicos é un dos alicerces fundamentais da boa xestión e os cales son de obrigado cumprimento para todas Federacións Deportivas Españolas de acordo coa normativa do CSD”, expón o goberno local na carta, antes de reiterar esa solicitude para “facer pública a documentación acreditativa do baremo e criterios obxectivos utilizados para o proceso de selección das sedes”. Tamén pide que “se identifique” aos membros do Comité que fixeron a selección, as puntuacións outorgadas e as observacións para a puntuación de todas as sedes que presentaron candidatura, así como as actas e/ou documentación acreditativa do acordo polo que se aproba a valoración.