O Concello de Vigo e a Deputación Provincial de Pontevedra confirmaron este mércores que instalarán pantallas ao aire libre na cidade olívica, o domingo 14 de xullo, para ofrecer a retransmisión da final da Eurocopa, que disputará España a partir das 21:00 horas. A institución provincial confirmaba mediante un comunicado aos medios á primeira hora da tarde que instalará unha gran pantalla o domingo na Praza da Estrela (un espazo próximo á delegación da Xunta e cuxa titularidade pertence á Autoridade Portuaria).

“Esta iniciativa permitirá aos afeccionados reunirse para seguir un partido de fútbol do máis alto nivel”, sinalou a Deputación, que tamén solicitou permiso ao Concello de Pontevedra para instalar unha pantalla na capital provincial. Minutos despois do comunicado da Deputación, o goberno municipal de Vigo remitía o seu propio, no que anunciaba a instalación dunha gran pantalla, nese caso, no auditorio do parque de Castrelos.

“Deste xeito, a cidade volverá vivir de forma excepcional un evento deportivo, igual que xa ocorreu na final do Mundial de Sudáfrica 2010 ou na final da Copa Mundial Feminina de fútbol 2023, nese caso na Praza de Compostela”, sinalaron desde o goberno local vigués e convidaron “a toda a cidadanía” a achegarse a Castrelos “para gozar xuntos deste histórico momento”.