O alcalde vigués Abel Caballero anunciou en rolda de prensa a reapertura do espazo Vigosónico, que permanecía pechado desde o inicio da pandemia e que, a pesar dun primeiro anuncio de reapertura a finais de febreiro, estará finalmente dispoñible de novo a partir do 3 de maio.

O peche destas salas de ensaio provocou numerosas protestas e a creación dunha plataforma de grupos musicais da cidade, que denunciaron reiteradamente a medida, e a ausencia de alternativas. O goberno municipal xustificou no seu momento a clausura pola necesidade de adaptar as instalacións á normativa sanitaria anticovid, e agora reabriranse con cinco salas equipadas con medidores de CO2.

Segundo explicou Abel Caballero, os grupos terán de prazo ata o 1 de maio para cubrir un formulario e solicitar días e franxas horarias para ensaiar, que serán asignados por orde de inscrición. As asignacións terán unha validez de 3 meses, ao cabo dos cales, os usuarios deberán volver solicitalas e repetir o proceso.