O Castelo de Sobroso, en Ponteareas, abre desde este luns unha nova etapa, tras unha intervención para musealizar e pór en valor o recinto, na que se contou coas novas tecnoloxías, recursos gráficos e montaxes, para impulsar aínda máis o atractivo deste edificio.

O acto de inauguración contou coa presenza da presidenta da Deputación de Pontevedra, Carmela Silva, e da alcaldesa de Ponteareas, Cristina Fernández, ademais doutros rexedores da comarca, e estivo amenizado polos ‘trasnos’ e outros personaxes da produción ‘Bosque Vivente’, a cargo de Sarao Animación.

Silva, que cualificou este luns como “día histórico”, subliñou que as melloras no castelo servirán para potencialo como foco de atracción turística na comarca, á vez que lembrou que o lugar foi escenario de acontecementos históricos relevantes que agora se poden coñecer a través da musealización.

A presidenta da Deputación destacou a vinculación do castelo á “primeira raíña de Europa”, Dona Urraca; ou o paso polo recinto de Emilia Pardo Bazán. “Por aquí pasaron grandes mulleres, que deixaron unha pegada moi potente”, proclamou. Así mesmo, mencionou a figura do mecenas Alejo Carrera (que adquiriu o castelo no ano 1923), e o seu papel na conservación desta “xoia”.

Tras a intervención realizada no recinto, cun investimento de máis de 260.000 euros, os visitantes poderán coñecer non só a historia do castelo, senón tamén da contorna e da sociedade desde a época medieval.

“EXPERIENCIAS” EN DIFERENTES ÁREAS TEMÁTICAS

Segundo explicou o director da musealización, Antoni Nicolau, as estancias do castelo adecuáronse para “ofrecer experiencias” a través das novas tecnoloxías e de producións audiovisuais, que fan un percorrido polos sucesos históricos que tiveron como escenario esta fortificación.

O percorrido polas diferentes salas distribúese en sete temas: ‘Sobroso na paisaxe’ (cunha impresión fotográfica dun gran mapa no chan e caixas retroalimentadas con imaxes nas paredes); ‘A historia do castelo e os seus habitantes’ (cun audiovisual que narra a vida no recinto medieval); ‘O castelo, protagonista na Idade Media’ (cunha montaxe de elementos téxtiles e módulos de personaxes como Dona Urraca, Alfonso VII, Dinís de Portugal ou Isabel de Aragón); ‘O castelo, da destrución á recuperación’ (un ‘videomapping’ que simula a destrución do recinto e a súa rehabilitación); ‘A construción do castelo’ (con paneis gráficos sobre os traballos para erixilo e explicacións sobre as abundantes marcas de cantaría’; ‘Os seres máxicos e a auga’ (que ilustra sobre as lendas da zona); e ‘Os castelos, escenario de trobadores’ (que recupera a tradición oral).

As visitas, pensadas para grupos de 15 persoas, irán acompañadas por un guía que, mediante unha tableta dixital, activará as producións audiovisuais e os xogos de luces e son, con posibilidade de facelo en diferentes idiomas (castelán, galego ou inglés). Así mesmo, explicará os detalles e anécdotas relacionadas co castelo e os seus habitantes.

Tras a inauguración da musealización levaranse a cabo unhas xornadas de portas abertas nas que poderán participar ata 450 persoas. Así, a partir deste martes 5 de abril poderanse reservar as prazas en reservas.castelodesobroso@depo.es para participar nesta actividade, que terá lugar os días 9, 10, 14, 15 e 16 de abril, con 6 pases diarios para 15 persoas cada un.

Ademais, segundo apuntou Carmela Silva, ao longo da semana habilitarase unha web propia sobre o castelo, na que se detallará toda a información histórica e a actualidade sobre a fortificación. A partir de maio, poranse á venda as entradas para visitar este enclave.