Tuia, fiuncho, coca de eucalipto, casca de arroz, caraveis ou queiroa son algúns dos materiais naturais que deixaron o seu arrecendo na mans de estudantes ponteareáns e irlandeses. Xuntos participaron este mércores nun obradoiro impartido por alfombristas de Ponteareas no que ademais de coñecer os materiais naturais que se empregan introducíronse na técnica de alfombrar ao xenuino estilo “Ponteareas”.
Tratábase de quince alumnos e alumnas irlandeses que un ano máis visitan Ponteareas dentro do programa ERASMUS. A Concelleira de Ensino, Cristina Fernández Dávila, trasladoulle ao alumnado a importancia social e turística do Corpus e as actividades que se desenvolven no marco destas festas.
Co obxectivo de promocionar a nosa arte efímera única no mundo polo seu sentir e pola súa longa tradición, a concelleira, que tamén é alfombrista colaborou na confeción desta alfombra na que se reproducía o escudo das dúas cidades.
Os estudantes galegos e irlandeses tamén participaron nun partido de fútbol gaélico no que os de Tuam amosaron parte das súas tradicións deportivas aos de Ponteareas.
