A alcaldesa do Porriño, Eva García, apela á “responsabilidade” das 500 persoas que asistirán o 29 de agosto ao Sons da Canteira, un festival que se celebrará nunha canteira en restauración neste municipio pontevedrés.
Este venres presentouse este festival, no que actuarán Mercedes Peón, Baiuca, Laura Lamontagne & PicoAmperio e DJ/VJ Juanma Lodo. A alcaldesa mostrouse “moi emocionada” con esta cita, na que considera que vai ser “unha experiencia fantástica“, á vez que chama a seguir as medidas de seguridade fronte ao COVID-19.
A concelleira de Cultura e responsable da organización deste evento que patrocina o Concello, Cami Moreira, lembra que non é a primeira vez que se elixe unha canteira no Porriño para un concerto, xa que en 1994 xa celebrou un baixo o nome ‘O son da pedra’.
Así, tradición galega e vangarda electrónica daranse a man nunha cita con “estritos protocolos de seguridade” fronte ao coronavirus, segundo explica a organización. Os espectadores poderán comer nunha das dúas ‘food trucks’ que acudirán ao evento, que contará con persoal dedicado en exclusiva á limpeza e xestión de residuos.
