A XXII edición do Festival de Cans arrinca este martes na aldea do Porriño coa retrospectiva internacional a Alejandro Loayza. A programación inclúe a proxección de 120 obras, das que 40 son estreas en Galicia. Moitas delas, apuntan nun comunicado, están marcadas por temáticas como o despoboamento, a memoria ou a identidade rural.
Así, pasarán polo festival novas voces do audiovisual galego e cineastas xa consagrados como Alfonso Zarauza, que recollerá o Premio Pedigree de Honra de Cans, Ángeles Huerta, Xacio Baño, Anxos Fazáns, Xiana do Teixeiro ou Daniel Sánchez Arévalo, que protagonizará o coloquio cnetral no Torreiro o sábado ás 12.00 horas, entre outros.
A primeira xornada do festival comezará este martes ás 10.00 horas coa apertura da exposición ‘Cans senior’ no Centro de Día de Torneiros e a inauguración da rúa efémera á cineasta pioneira galega Cruz Risco, coa asistencia da actriz Isabel Risco, familiar da cineasta, e o investigador Xaime Varela, que protagonizarán un coloquio no Baixo de Carlos.
A tarde se centará na memoria histórica. Os asistentes poderán participar nunha visita guiada ás 17.00 horas á exposición ‘Reisiño, ou prisioneiro debuxante’, que pon o foco sobre a figura de Alfredo Bautista Alconero ‘Reisiño’ (1912-2000), no 25 aniversario do seu falecemento.
A HISTORIA DUN REPRESALIADO
Reisiño estivo preso catro anos na Illa de San Simón, onde sufriu a represión franquista e debuxaba a outros compañeiros presos no seu tempo libre. Ao redor da figura de ‘Reisiño’, proxectarase o documental ‘Aillados’, de Antón Caeiro, e posteriormente, se visionará en exclusiva as primeiras imaxes inéditas do filme ‘San Simón’, dirixido por Miguel A. Delgado.
Tamén este martes ás 18.00 horas proxectaranse os curtos nos que o cineasta boliviano Alejandro Loayza, ao que o festival dedica a súa retrospectiva, deixou o seu sinal como director de fotografía, e que ao mesmo tempo representan un escaparate de cortometrajistas latinoamericanos actuais. Ademais, o público poderá ver ‘Polvo’ do arxentino Emiliano Longo, ‘Dochera’, do boliviano Álvaro Manzano Zambrana e ‘Aicha’ do cineasta chileno Vinko Tomicic, premiadas en diferentes festivais latinoamericanos.
Este martes será ademais o último día para adquirir entradas en liña e só poderanse comprar fisicamente en Cans os días do festival. Para a sección de Ficción quedan as últimas 30 entradas dispoñibles e para Furacáns, 60.
