O escritor do Porriño Diego Giráldez García é o gañador do XLIII Premio de Novela Eduardo Blanco Amor polo seu traballo ‘As obras póstumas’. Así o acordou o xurado, que se reuniu no Centro Cultural Marcos Valcárcel, ao escoller a obra por maioría entre un total de 49 orixinais presentados a esta edición, máis do dobre das obras recibidas na cita pasa. O galardón, organizado pola Fundación Eduardo Blanco Amor, está dotado con 15.000 euros e unha peza artística do escultor Acisclo Manzano.

No seu fallo, o xurado destacou o estilo “directo, rico e cargado de simbolismo” que caracteriza a obra premiada, na que aborda a historia dunha escritora que, ante o diagnóstico de demencia, reflexiona sobre a vida e sobre o seu traballo. A prosa elaborada de Giráldez, engadiu o xurado, crea unha “atmosfera estremecedora” sobre o tempo e a memoria e mostra a “dura realidade” sobre o tratamento da enfermidade psiquiátrica do pasado “sen caer en estereotipos”.