O Concello de Vigo porá á venda o vindeiro xoves, día 18 de xullo, as entradas para asistir á platea do auditorio de Castrelos durante o concerto de Luz Casal, mentres que na bancada será gratuíto, tal como lembrou o alcalde, Abel Caballero.

Nun audio difundido aos medios de comunicación, o rexedor explicou que, como no resto de actuacións, 4.000 pases serán vendidos de forma presencial. Custarán 10 euros e venderanse de forma nominal nos despachos de billetes do propio auditorio de Castrelos 2.000 pola mañá (09:30 horas) e outras 2.000 pola tarde (16:30 horas). Outras 1.000 serán vendidas de forma ‘en liña’ na web do Concello, 500 en horario de mañá e 500 pola tarde.

Cada persoa poderá adquirir ata catro entradas, pero presentando o DNI ou unha copia das persoas que acudirán para “evitar a revenda”. Luz Casal actuará en Vigo o 2 de agosto. Desta maneira, o luns 15 venderanse as entradas para Luís Fonsi, mentres que o martes 16 estarán dispoñibles as reservas de Sen Senra.