Alvarellos Editora publicará proximamente ‘E Camino de Santiago’, unha guía “moi persoal” do escritor galego Álvaro Cunqueiro que viu a luz en Vigo en 1965 e que non volveu ser editada desde entón.

Segundo apuntan nun comunicado, a presente edición conta cun preámbulo do fillo do autor, César Cunqueiro, un estudo da especialista María Xesús Nogueira, e notas explicativas ao pé ao longo de todo o texto, ademais de diversas ilustracións.

“Estamos ante un texto breve pero de desbordante caudal narrativo, onde cada parágrafo se recrea nun suceso, sexa real ou imaxinario, ou unha combinación de ambos. Denominámolo ‘o libro esquecido’ porque así permaneceu durante todos estes anos”, destacan desde a editorial.

Apuntan que Álvaro Cunqueiro se consideraba “o último peregrino medieval”. “A viaxe é para min unha experiencia poética”, lembran que afirmaba. E por iso, convidan a “viaxar a con a prosa única de Cunqueiro por este milenario Camiño de Santiago co que tanto se identificaba”.