Vigo xa ten un novo festival, CREATIVA. Festa da creatividade e da cultura. Un novo proxecto que nace da Galería Maraca e da Revista Dot, que unifica creatividade e cultura nun evento que pretende achegar a cultura a novos públicos, ampliando os seus límites, tanto espaciais como conceptuais.

Do 18 de abril ao 5 de maio uns 40 artistas, creativos, músicos, deseñadores e creadores en xeral pasarán por Vigo para compartir o seu traballo e reflexións a través de charlas, exposicións, concertos, obradoiros e presentacións de libros en diversos espazos da cidade.

A arte, a música, a ilustración, o deseño ou a moda serán algúns dos protagonistas nestas dúas semanas cheas de experiencias vinculadas á cultura e á creatividade, entendendo a cultura como motor de cambio e transformación e tratando de expandila ao máximo, chegando a todo tipo de público en formatos asequibles para todos e xerando un modelo de lecer actual e cultural, achegando a Vigo por primeira vez un tipo de evento xa consolidado noutras grandes cidades como Barcelona, ​​Madrid ou Málaga.