O Grupo Ecoloxista ADENCO ten presentado estes días novas denuncias por verquidos de augas residuais sen depurar desde a depuradora de Ponteareas ata o espazo protexido Río Tea.

Estas denuncias súmanse ás preto de tres ducias xa efectuadas desde o mes de novembro do ano pasado, e que teñen motivado a apertura por parte da Confederación de varios expedientes sancionadores ao concello de Ponteareas por estes feitos. Desde o colectivo ecoloxista estase a facer un seguimento dos verquidos da depuradora, con visitas case diarias aos puntos de verquido.

Alegan desde ADENCO que “seguiremos denunciando esta situación e, máis alá de sancións económicas, que pagamos todas, seguiremos insistindo na procura de solucións reais e rápidas a todos os problemas cos que conta o río Tea”.

“O espazo protexido, que conta cunha grande riqueza en fauna e flora, non pode continuar padecendo as agresións derivadas das actuacións das propias administracións públicas. Nese senso, desde ADENCO continuaremos denunciando calquera actuación agresiva co río Tea”, concluíron.