As familias da Escola unitaria San Mateo, en Ponteareas, viron no medio do verán como desaparecía oficialmente a escola das súas fillas e fillos; desapareceu no DOG porque tiña pouco alumnado, “porque non é rendible mantela aberta, porque á Xunta de Galiza non lle interesa nin a educación de calidade, nin a mellora do rural galego, nin a defensa de modelos educativos de atención dedicada”, veñen de denunciar desde a Conferencia de Anpas Galegas.
“Como as familias non ficaron caladas, como protestaron e se moveron, e atoparon apoios e defensa, ao final os voceiros da Xunta abríronlles unha porta de esperanza, conseguir seis alumnos e ter de novo a Escola”, subliñan.
Aseguran que “iso foi o que lles dixeron o 27 de agosto, logo de que tiveran que forzar unha xuntanza ás portas de San Caetano, e dito polo propio Secretario Xeral da Consellaría de Educación, quen marcou as regras do xogo”.
“E as familias cumpriron, agora mesmo hai 6 crianzas matriculadas nesa Escola que xa non existe, e cando as familias reclamamos o cumprimento do acordado, a Xunta vólvese atrás, “entendestes mal, esas seis crianzas tiñan que estar no mes de marzo”, lamentan.
“Foi iso o que se lles dixo ás familias diante de moitas testemuñas, foi iso o que as familias conseguiron, e é iso o que as familias esixen: que se abra de novo a súa Escola, a Escola onde queren educar aos seus fillos e fillas, e tamén a Escola que dá vida a unha zona, e o lugar onde se practica un modelo de Ensino que tería que xeneralizarse no canto de facelo desaparecer”, denuncian enerxicamente.
A Confederación de Anpas Galegas teno claro: “A Consellería de Educación o único que quere é minorar o gasto educativo, diminuír o número de unidades “de baixo rendemento económico”, para maximizar o uso das aulas ata telas todas cheas ata o máximo de alumnado posíbel; aínda que ese alumnado teña que pasar horas e horas desprazándose en autobús; aínda que esa unificación provoque a desaparición de aldeas e pobos enteiros, porque un pobo sen escola non pode sobrevivir”.
Dende a Confederación esixen que non se peche a Escola Unitaria San Mateo de Ponteareas, “porque ten alumnado de abondo para non se pechar, porque é necesaria para vertebrar a zona na que se encontra, porque representa un formato educativo que reivindicamos como positivo e axeitado ao noso País; e porque, como nós dixemos sempre, tamén di para a galería o señor conselleiro: a educación non é un gasto, é unha inversión”.
