Aguas de las Cuencas de España (Acuaes) declarou deserta a licitación das obras de mellora da depuradora da Moscadeira, no municipio pontevedrés de Ponteareas, ao non presentarse ningunha oferta.

O contrato de licitación era de 5,8 millóns de euros (sen IVE incluído), cun prazo de execución de 30 meses. O prazo para a presentación de ofertas finalizou o 27 de maio. Nun comunicado, o Grupo Municipal do PP lamenta que “a nova depuradora, tan necesaria para finalizar o saneamento e abastecemento de Ponteareas, sufra un novo pau ao quedar deserta a súa licitación.

“Non sabemos se se debe a un problema no proxecto ou un erro no cálculo de investimento e orzamento, o certo é que, polo momento, ningunha empresa considera interesante e rendible facer esta infraestrutura. Sospeitamos e así o denunciamos no seu momento que o importe destinado polo Goberno central a esta obra era insuficiente, seguramente este sexa o principal motivo polo que ninguén ofertou” sosteñen os populares.